Dead Dead Demons, Inio Asano (Ast)

en

Cuando falamos d’Inio Asano, facémoslo d’un autor que nun se carauteriza pol epicismu de les sos obres, nin tampoco poles escenes d’aición nin los combates heroicos del bien escontra’l mal, nin personaxes qu’esconsonen pela mañana col enfotu de cambiar o salvar el mundu nin de vivir una gran aventura.

Como autor, enmarcaríemoslu, más bien nuna corriente costumista onde se nos presenten personaxes ordinarios en situaciones de caldía, con unos intereses que nun van acullá de lo mundano.

Si echamos una güeyada a la so obra, vemos que les premises de les que parte son siempre cencielles y simples; el mesmu Asano sorraya que nun dedica más de venti minutos a la construcción de la trama d’un manga davezu. Esto nun ye necesariamente malo cuando vemos que d’un seinen xurde Solanin, Oyasumi Punpun, Sekai no owari yoakemae, Funwari otoko o Bakemono recchan. Y, pa más aquello, protagonizaos por personaxes femeninos… ¿imaxináis cualquier otru manga d’esti tipu y con estes premises no que dexeneraría? (cof cof Gantz cof cof)… Pero bono, volviendo al tema, lo que digo ye que ye más bien al revés, porque lo que convierte a Inio Asano nunu de los meyores artistes de manga contemporáneos, ye facer que dalgo tan corriente, habitual y común, poro, falto del exotismu d’aquello inusual y atípico a lo que-y daríemos valor per se, atractivo pa nós.

El so desarrollu ye lentu y posáu, lo que podría resulta-y pesao a dél públicu, porque nun ta demandándote l’atención con xiros inesperaos, nueves tresformaciones definitives d’enemigos, escenes inverosímiles de sexu con tetes al aire (cof cof Gantz cof cof) nin nada pol estilu. Asano siempre da prioridá al desenrueldu dramáticu de la hestoria y los personaxes perriba de cualquier tipu d’aición, concendiéndo-y’l pesu’l guión a les rellaciones que caltienen los y les protagonistes col mundu que los arrodia. Creando emociones dende l’interior.

¿Cómo concasa un autor asina faciendo una obra de ciencia ficción?

Dead Dead Demons Dededededestruction ye’l primer contautu d’Inio Asano con esi xéneru. Y ye mui interesante. Pa situanos, amuésanos Tokyu tres años depués de l’arribada d’una xigantesca nave espacial d’una civilización estraterrestre a la Tierra. Los habitantes de la ciudá nun ye namás que seyan conscientes de la so situación, ye que, amás, conviven a diario cola presencia imponente d’un ovni flotante sobre les sos cabeces.

Por esa sinópsis podríemos tar falando de V: The visitors, Disctric 9, Independence Day, The Arrival, The Day the Earth Stood Still y cientu y picu más. Vamos, que nun ye’l pioneru nesti xéneru. Pero, como yá sorrayé sobre no que ye bonu Inio Asano, ye en facer qu’una hestoria mil vegaes vista, tenga dalgo colo que contribuyir al xéneru al empar alloñándose de clichés y estereotipos.

Les protagonistes principales de la trama’l manga son Kadode y Ontan. Nun son heroínes. Nun tán destinaes a salvar el mundu (¿o sí?) o pilotar naves espaciales nuna amarraza interestelar.

Son neñes.

Asano fai un trabayu almirable a la hora de carauterizales como adolescentes a piques d’escomencipiar una etapa, l’adulta, y tolo qu’ello conlleva. El so fuerte ta n’aprendenos a mirar al traviés de los sos güeyos y facer que nos les creamos. L’avance tan lentu ye vital pa empatizar con elles (tarda los sos 24 capítulos en terminar les sos presentaciones y dar un pasu más), d’entender la so angustia vital, de cómo s’enfrenten al procesu de madurecer, pa comprender la forma de cada una d’elles d’afrontar el vivir nun mundu nel que los medios de comunicación, redes sociales y sistema políticu escurecen aínda más la perspeutiva de futuru, yá de por sí inciertu, tres años depués de l’apaición de la nave espacial.

Kadode ye l’espeyu de too ello, d’esa mentalidá y d’esa impotencia, porque nun sabe lo que quier, nin sabe quién ye, nin entiende’l motivu d’ello o cómo algamalo. Nun hai contestu que-y lo permita, con una familia disfuncional y cola promesa de destrucción masiva de la nave espacial, bien visible encima de la ciudá. Demuéstralo dende l’entamu na so primer apaición –onde yá destaca’l llinguaxe visual d’Asano– y sorráyalo cola so problemática rellación con Naoki, el so antiguu profesor d’institutu, a lo llargo de la serie. Isobeyan, un exemplu de metaficción, inspiráu na estética de Doraemon, introduz aspeutos del argumentu nuna especie de “caricaturización” de la rellación Doraemon-Nobita que, nun estadiu más “adultu”, va tratar Asano con Kadode, Ontan y l’alien que conocen (gorrucópteru incluyíu).

No tocantes a Ontan… bono, nun hai pallabres pa definir un personaxe tan singular como ella (ya Hiroshi, l’hermanu). Al entamu quiciabes pueda paecer bastante paranóica ya infantil (patente nos sos temes de conversación y espresiones faciales), pero, darréu, vas descubriendo que ye una conducta de defensa énte una realidá pola que se siente superada, a la que-y tien mieu y a veces, nun soporta.

Ye una ayalga lleer les sos interaiciones y reaiciones; tanto ye asina qu’hai momentos, especialmente cuando ta’l grupu d’amigues toes xuntes, nos qu’escaeces el restu’l mundu y lo único que quies ye dexar que seyan elles mesmes. Enllenen les páxines cola so presencia de tal manera que, cuando avances abondo na trama, esa sensación de lentitú que pue unu tener por causa d’esi desarrollu tan posáu d’Asano, despaez y pue llegar a ser frenéticu.

¿Por qué? Pues porque, conforme vamos terminando de conocer a les protagonistes principales de la hestoria, Asano siéntense con seguridá abondo como pa introducir otros protagonistes secundarios que van a ser los nuestros güeyos n’otros escenarios, y colos que va desarrollar aspeutos estremaos de la sociedá. Takemoto, que llega dende Futaba con Tainuma mediáu’l manga, va introducinos nel activismu pro-derechos de los estraterrestres, y va chocar escontra los comandos que s’adentren nes zones prohibíes p’asesinalos ensin piedá.

Asina se nos amuesa otra carauterística importante nel desenrueldu de la trama, enseñándonos otra parte del llienzu que conformen les pincelaes que son los personaxes nos sos ámbitos: la política pa colos estraterrestres y la naturaleza de la sociedá humana capitalista.

Si nos moviéremos nos parámetros clásicos del xéneru, los estraterrestres sedríen la principal amenaza pa la subsistencia de la especie humana, y la trama autoxustificaría y glorificaría la violencia, faciéndola necesaria como únicu mediu viable pa sobrevivir (cof cof…). Ensin esceición. De fechu, esi ye’l leitmotiff de la mayoría de series o películes del xéneru.

Asano nun tien reparu dalu a la hora de facer lo que tenga que facer colos personaxes pa mostranos escenes de violencia, pero tampoco nun tien piedá cuando quier facenos conscientes del sufrimientu que d’ella se deriva. Equí nun ye xenérica, nin aséptica, y cada acción conlleva una rempuesta qu’afeuta a nivel dramáticu al caráuter de les protagonistes.

Cuando muerre un personaxe siéntese como real. Yo mesmu me sorprendí volviendo a relleer los tomos anteriores cuando, ensin prevelo, el manga anuncióme la muerte d’un personaxe. Quería asegurame de que yera verdá. Nun lo creyía. Lo primero que pensé foi que salté dalguna páxina ensin dame cuenta, y nun albidré qu’esi personaxe diba morrer. Busqué una posible despidida velada, un presentimientu de dalguién… ¿alcordáisvos de la primer muerte de Krillin? Goku escaeciere’l bastón del güelu onde’l tornéu y él ofrezse a dir a busca-yla. Goku míralu marchar corriendo, estrañáu, col presentimientu de que nun va volver a velu más. Y, entós, siente en so interior la voz de Krillin llamalu. Cuando llega, Krillin morrió. Por embargu, la muerte equí llegónos como una muerte real. Y como tala, hebo que la dixerir igual, como si nosotros fueremos un personaxe más.

Darréu, la vida siguió. Elles siguen creciendo.

Tampoco nun hebo culpables, polo menos non como Tambourine en Dragon Ball. Ye difícil culpar a los estraterrestres, que nun puen mover la nave, pero esto tamién ye interesante. Nun son seres brutales, nin violentos, nin imponentes. La primer vegada que los vemos, mui avanzáu yá’l manga, porque, como dixi, les protagonistes nun tán en primera llinia de guerra, nun ye lo qu’esperamos. Los primeros contautos son con mini naves que se dixebren de la nave nodriza y que derriben… ¡guah.es con piedres del suelu!

Pero ¿por qué los odien? Esta entruga podríemos facénosla a nosotros mesmos. La cosa ye que’l gobiernu de Xapón y de los EEXX tienen sacao alantre unos programes de propaganda anti-alien que funden a la población nel más absolutu temor a ser atacaos y borraos del planeta por seres a los que nunca nun conocieron. L’oxetivu ye facer constante esi temor, algamar la estabilidá social remanando’l mieu escontra un enemigu desconocíu, que fala una llingua que nun puen entender, un enemigu con traces de ser invencible y tan descomunal como la so nave espacial.

La guerra ye rentable; ye peresplícitu Asano falando’l xorrecimientu de la industria armamentística en Xapón y de la bonanza económica que tán viviendo coles máquines de guerra que llancen misiles a distancia, usando a la clas política, en continua campaña.

La guerra ye rentable si ye constante, y asina lo dicen.

Imaxino que ye intencionao’l facer a los soldaos y a los políticos con un aspeutu cómicu, que paecen fatos, cuando, lo normal, ye qu’estos, eternos héroes de películes, habríen ser l’epítome de la virilidá protomasculina, bien proporcionaos y, por supuestu, curiosos. Habríen ser la fantasía de poder que representen, pero nun lo son.

Agradezse que la primer escena na que somos cómplices del asesinatu d’unos aliens nun seya propia d’una película d’aición. Y más, teniendo en cuenta que los aliens tienen l’apariencia de neños… atopámoslos escondíos de los soldados, a una pareya, abrazada pol mieu. Darréu, el soldáu dispara. Ye desagradable ver la sangre y cómo l’alien superviviente llora intentando despertar al so compañeru al que-y acaben de volar la cabeza.

Nun ye épico, nin glorioso. Ye feo y monstruoso.

Esa mesma escena vuelve a la mente del soldáu más alantre, atormentándolu, mentanto que, de fondu, siéntese’l discursu apoloxéticu de la violencia, llamando a los aliens monstruos, asesinos, la desgracia’l país y termina cola equiparación, per parte del soldáu, d’unos con (cola idea que tienen ellos de los) otros, al falar dende la inorancia.

Endagora nun terminé de lleer el manga, que tampoco ta completu, pero préstame la espectativa de ver cómo igurará Inio Asano esta casuística, y les implicaciones personales que tendrá la violencia pola violencia, sobremanera cuando descubramos l’ataque que planeen los aliens como midida desesperada escontra la violencia incontrolable del estáu. Especialmente, na trama de Takemoto, partidaria de la llinia non violenta pa defender los derechos de los aliens y la d’Ontan y Kadode col mozu del gorrucópteru.

La obra claro que tien aspeutos negativos, como que la trama del mozu de Kiho ye demasiao obvia nos últimos capítulos, y tien un procesu d’extremización demasiao poco creyible, pero paécenme poco reseñables en comparanza con tolo bono que tien qu’ofrecer el fondu de la obra. Quiciabes, cuando tea terminada, cambie d’opinión y vuelva sobre esti análisis, pero nesi momentu, de xuru que podré vela como un too acabáu, anque les obres d’Asano tiendan a nun zarrar la hestoria en términos absolutos, sinón como acabu d’un procesu, cosa que me paez un aciertu en toa regla.

 

Deja tu comentario